۔
فیڈریشن آف آل پاکستان یونیورسٹیز اکیڈمک سٹاف ایسوسی ایشن پنجاب کے صدر، ڈاکٹر عبدالستار ملک، جنرل سیکرٹری ڈاکٹر احتشام علی اور اکیڈمک سٹاف ایسوسی ایشن ، پنجاب یونیورسٹی کے سیکرٹری ڈاکٹر امجد عباس مگسی نے ایک مشترکہ بیان میں ایچ ای سی کے ترمیمی آرڈیننس 2021 کے تحت چئیرمین ایچ ای سی ڈاکٹر طارق بنوری کو عہدے سے ہٹانے جانے کے طریقہ کار کو غیر مناسب قرار دیتے ہوئے اس پر اساتذہ برادری کی طرف سے تحفظات کا اظہار کیا ہے۔
اُن کا کہنا تھا کہ اگرچہ سابقہ چئیرمین کی چند پالیسیاں اساتذہ کرام اور اعلی تعلیم کے شعبہ کے لیے نقصان دہ تھیں،مگر جس عجلت میں یہ آرڈیننس جاری کیا گیا اور چئیرمین کے عہدے کی معیاد کو دو سال کم کر کے ممبران کی مدت کو چار سال برقرار رکھا گیا وہ انصاف کے تقاضوں پر ایک بہت بڑا سوالیہ نشان ہے۔
مشترکہ بیان میں اِس خدشے کا بھی اظہار کیا گیا کہ پہلے سے زبوں حالی کے شکار شعبہ اعلی تعلیم کو ایک مدت سے افسر شاہی کے زیر تسلط لانے کی کوششیں کی جا رہی ہیں لہذا ہمارا مطالبہ ہے کہ نئے چئیرمین کے لئے شعبہ تعلیم و تدریس سے وابستہ اور انتظامی امور کے ماہر فرد کا انتخاب خالصتاً میرٹ پر کیا جائے۔ منتخب ہونے والے ماہر تعلیم و تدریس کو پاکستان کے زمینی حقائق کا مکمل ادراک ہو اور وہ مسائل کا مقامی حل پیش کرنے کی مکمل صلاحیت رکھتا ہو۔
مشترکہ بیان میں مزید واضح کیاگیا کہ کسی بھی بلاواسطہ یا بالواسطہ طریقے سے یونیورسٹیوں کی خودمختاری پر کوئی سمجھوتہ نہیں کیا جائے گا اور ہائیر ایجوکیشن کمیشن کےچئیرمین کے عہدے کے لیےکسی بیورو کریٹ کو بھی کسی صورت قبول نہیں کیا جائے گا۔